May 2011 Update/scn

From Strategic Planning
Jump to navigation Jump to search

 
Salutamu,

Sugnu Ting Chen, lu prisidenti di lu cunzigghiu d'amministrazzioni dâ Wikimedia Foundation.

Du' misi arreti, la Wikimedia Foundation pubblicau li risurtati dâ nostra nova Editor Trends Study (li poi lèggiri ccani, n nglisi), ca ammustrau ca, nta l'ùrtimi anni, pî cristiani addivintau sempri cchiù diffìcili cullaburari nta li pruggetti Wikimedia. Nta l'ùrtimu misi, ntô cunzigghiu d'amministrazzioni ci fu na gran discurruta supra a stu tema, e successivamenti, appruvammu a l'unanimitati na dichiarazzioni unni t'addumannamu siddu voi partecipari cu nuàutri a aiutari li pruggetti Wikimedia a divintari cchiù graputi e cullaburativi.

Pi favuri, leggi la nostra risoluzzioni, e ti dumannu macari di lassari nu cummentu e cunnividi li to' pinzeri.

Li me' megghiu auguri, e grazzi pâ to' participazzioni ê pruggetti Wikimedia.

Ting Chen
Prisidenti di lu Cunzigghiu d'Amministrazzioni Wikimedia

Dicisioni: Apirtura

Nuàutri, lu Cunzigghiu d'Amministrazzioni dâ Wikimedia Foundation, cridemu ca la bona saluti dî cumunitati dû nostru pruggettu è cruciali pi jìnchiri la nostra missioni. Li pruggetti Wikimedia sunnu funnati supr'â curtura di l'apirtura, dâ participazzioni e dâ qualitati ca havi criatu una di cchiù granni cugghiuti dâ canuscenza umana. Ma mentri li litturi e li so' membri stannu aumintannu, studi ricenti supra a chiddi ca partècipanu ammustraru na custanti diminuzzioni ntâ participazzioni e ntâ pirmanenza di li novi cuntribbutura.

Comu stabbilutu ntô nostru Strategic Plan dâ durata di cincu anni, e ncarcatu di sti risurtati, Wikimedia havi lu bisognu di cògghiri e mantèniri cchiù novi e diversi cuntribbutura, senza pèrdiri chiddi cu na spirènzia cchiù granni. Na cumunitati stabbili di partecipatura è funnamintali pâ sustenibbilitati e la qualitati, nta lu longu pirìudu, di ntrammi dî nostri Pruggetti e di lu nostru muvimentu.

Nuàutri cunziddiramu sta sfida comu la nostra prioritati assuluta. Spiamu a tutti li cuntribbutori di pinzari supr'a sti temi ntô travagghiu jurnalieru intra ê nostri pruggetti. Sustinemu lu Diritturi Esecutivu a fàciri di chista la prioritati assuluta, e cci raccumannamu di fàciri crìsciri l'assegnazzioni di li risorsi dâ Funnazziuni faciuti pi risòrviri stu probblema, tràmiti la sinzibbilizzazzioni dâ cumunitati, l'allargamentu di li sforzi e li migghiuramenti tècnichi. Sustinemu macari li ridattura, sviluppatura, wikiprojects e Chapter ca stannu travagghiannu pi cumminari li pruggetti cchiù accessìbbili, accugghienti e cumprinzivi.

Lu Cunzigghiu dicidi d'aiutari a purtari avanti stu mpegnu e nvita a specifichi addimàniti d'assistinza dâ Funnazziuni mu lu fa. Accugghiemu e ncuraggiamu lu sviluppu dî novi idei a aiutari a agghicari li nostri obbiettiva d' apirtura e làrica participazzioni.

Nvitamu la cumunitati di Wikimedia a prumòviri l'apirtura e la cullabburazzioni:

  • Trattannu li novi cullabburaturi câ pacenza, câ gintilizza e cû rispettu, cunzapèvuli dî sfidi c'aspèttanu li novi cullabburaturi e ncuraggiannu l'àutri a fàciri lu stissu;
  • Migghiurari la cumunicazzioni ntê pruggetti, simprificannu la pulìtica e la struzzioni, e travagghiannu chî culleghi pi migghiurari e rènniri cchiù amichèvuli li pulìtichi e li pratichi dî template, l'avvisi e li scancillazzioni;
  • Sustinennu lu sviluppu e la ntroduzzioni di funziunalitati e strumenta pi migghiurari l'usu e la trasuta;
  • Aumintannu la cunzapivulizza dâ cumunitati supra a sti prubblemi e sustinennu li sforzi di sinzibbilizzazzioni di li ndivìdui, di gruppa e di Chapters;
  • Travagghiannu chî culleghi p' arridùciri li sciarri e prumòviri l'amicìzzia, la curtura pi na maiuri cullabburazzioni, ncludennu cchiù ringrazziamenti e cunzenzi; e ncuraggiannu li megghiu pratichi e li leader dâ cumunitati; e
  • Travagghiannu chî culleghi pi sviluppari pratichi pi dijittari na cunnutta distruttiva e ostili, arrimuttannu li troll e li stalker.

Rifirimenti